如何飛燈 -- 簡述離機使用外置閃燈的方法 (新加入有效距離測試

如何飛燈 -- 簡述離機使用外置閃燈的方法 (新加入有效距離測試

簡述 Nikon 相機離機使用外置閃燈方法

我地成日講飛燈﹐即將外置閃燈放係機身 hot shoe 以外o既地方。
其實好多情況下﹐燈光都唔係放置於機身 hot shoe 上o既﹐如影樓燈光﹐根本唔係設計係 hot shoe 上用。
我地亦可以架設檯燈等等燈光去照明﹐一般唔會有人叫咁係飛燈。


點解要飛燈﹖
多數都係為o左更佳燈光效果﹐包括控制光o既方向同光質。

如放置於機身 hot shoe 上﹐閃光係直打埋去﹐立體感係好弱o既。
透過控制光o既方向﹐可以造出更立體o既效果。

打 bounce 係可以改變光線o既方向﹐不過可受控制o既程度低﹐反射面o既角度、距離同質地往往唔能夠受控制﹐攝影者相當被動。
除o左加強立體感﹐仲可以嘗試誇張o的o既效果。

而閃燈亦可配上較大尺寸o既附件去改變光質﹐如柔光傘﹐放置於機身 hot shoe 上則會受制於機身。